F1的菜鳥｜Behind The Shots
我雖然影咗十幾年運動，亦影過好多場賽車，但今次係第一次影一級方程式賽車(F1)，實在大開眼界，亦都深深感受到自己嘅不足，上咗非常寶貴嘅一堂！
鈴鹿車場附近酒店唔多，今次入住比較近嘅桑名市，但係都距離個幾鐘車程。攝影師一般都會早一日去到車場處理一啲雜務，仲要去睇吓賽道有乜變化，再決定拍攝計劃。對於我哩個菜鳥，仲要加多一項——買紀念品，因為到觀眾可以入場嗰陣，佢哋就會好似蝗蟲咁買哂所有紀念品。今次快人一步，理想達到，點知竟然係今次行程中我最成功嘅一日！
場外車迷為自己支持的隊伍悉心打扮
早到的鳥兒無蟲吃
第一日練習時段，我哋預早兩個幾鐘到車場，但好多車迷比我更早，已經喺車場唯一出入通道等車手出現，希望可以攞到車手簽名。未夠鐘影車，我梗係唔會放過任何機會，即刻走去影車手上班。
練習賽前四十分鐘，我依計劃到咗預定位置，試吓構圖、焦距、快門組合等等，希望一開始就可以影到理想嘅相。但當見到戰車出現，先發覺理想與現實相差好好好遠！F1嘅速度遠遠超出我預算，相機追唔上戰車速度，人愈緊張就愈調節唔到，第一次F1拍攝真係超級失敗，差唔多炒晒！
返到記者室，偷偷哋𥄫吓其他人影咗啲乜， 唔睇猶自可，睇咗仲沮喪。 唯有冷靜啲分析吓失敗原因，希望能夠喺最短嘅時間內調整好，再戰晏晝第二場練習。第二次練習，因為落雨，半個鐘有多連車影都見唔到一個，唔好話點構圖，無車又點會有相呢？終於啲雨細咗，但只係等到幾架戰車出現，影唔到理想嘅雨中構圖，但可能落雨車速收慢咗，總算影到一啲預計嘅構圖，終於有功課交。
雨天預計可以影到水珠凝聚在車輪上嘅效果。可惜車隊細雨先出車，願望落空
每日都考應變
吸收咗第一日嘅經驗，又𥄫咗好多其他攝影師嘅相，唔少人用櫻花嚟襯托賽車，咁我就決定去影櫻花樹。以為好容易，點知到咗現場後，先知道有幾難！櫻花樹唔多，地方又有限，仲有好多攝影師，好在我好快搵到節奏，不斷走位同攝位，終於影到我要嘅櫻花相。晏晝排位賽，車速更快，可以近距離影相實在非常震撼，總算無驚無險完成咗，迎接最後一日嘅正賽。
正賽日我先到觀眾區影花絮，好熱鬧好有氣氛，唔少觀眾會刻意打扮嚟支持自己鍾意嘅車隊同埋車手。開賽前車手會圍繞賽道一圈同觀眾打招呼，我趁機留喺賽道用車手角度嚟影觀眾嘅反應。
正賽選擇正面影起步，全部戰車一齊衝過嚟，感覺相當有氣勢，由於意外要再次起步，就多咗次機會俾我呢個把握力唔高嘅菜鳥影，算係多一次補考吧。過咗兩圈，參考其他攝影師行動，喺每個位置只會逗留兩至三個圈，唔理影得滿唔滿意，都會趕去另一個影相位，喺賽事完結前就一早返去維修站旁邊排隊等候影頒獎。實在太多突發因素影響，早早預定嘅位會被嘉賓、車隊人員，甚至其他攝影師阻礙，總之會有數之不盡嘅人會突然企喺你面前，咁咪當「訓練自己應變能力」嘅場合，喺一大堆人舉手機影頒獎禮嘅環境下，終於完成我三天日本鈴鹿F1拍攝。
發現場外一顆櫻花樹，將佢變成背景襯托
速度、速度，都是速度
我第一次影F1，最大得著就係學到「控制速度」！首先係適應賽車嘅速度，然後係諗構圖嘅速度，仲有影到相嘅速度，最後就係後期處理相片嘅速度。喺F1嘅世界裡，現場感受到自己與其他專業攝影師喺速度上嘅差距，亦感覺到喺運動攝影上，仲有漫漫長路要走。
Text、Photo：Olddog
Design：Yvonne
原文刊於《運動版圖》2024年6月號
